
ފިޔޯރީ ހެލްތު ސެންޓަރުގެ ޚިދުމަތް ރަނގަޅުކުރުމަށް ކައުންސިލް ރައީސް ސްޓޭޓް މިނިސްޓަރާ ބައްދަލުކުރައްވައިފި
ފިޔޯރީ ހެލްތު ސެންޓަރުގެ ޚިދުމަތްތައް ރަނގަޅުކޮށް، 24 ގަޑިއިރު ޚިދުމަތް ދިނުމަށް ބޭނުންވާ ވަސީލަތްތަކާއި މުވައްޒަފުން ހަމަޖެއްސުމާ ގުޅޭގޮތުން މަޝްވަރާކުރެއްވުމަށް ކައުންސިލް ރައީސް ވަނީ ހެލްތު މިނިސްޓްރީގެ ސްޓޭޓް މިނިސްޓަރ އަޙްމަދު ޤާސިމްއާ ބައްދަލުކުރައްވާފައެވެ.
މި ބައްދަލުވުމުގައި ފިޔޯރީ ހެލްތު ސެންޓަރުގެ ހިންގުމާ ހަވާލުވެ ހުންނެވި ވެރިޔާ، ސީނިއަރ އެޑްމިނިސްޓްރޭޓަރ ފޮރ ހެލްތު ސަރވިސަސް މުޙައްމަދު ސަޢީދު ވެސް ބައިވެރިވެ ވަޑައިގެންނެވިއެވެ.
މި ބައްދަލުވުމުގައި ސްޓޭޓް މިނިސްޓަރު އަޙްމަދު ޤާސިމް ވަނީ ހެލްތު ސެންޓަރަށް ބޭނުންވާ މުވައްޒަފުން ހަމަޖެއްސުމުގެ މަސައްކަތް ކުރިއަށް ގެންދަވާނެ ކަމުގެ ޔަގީންކަން ދެއްވާފައެވެ. އަދި މި މަސައްކަތް ދާދި އަވަހަށް ނިމިގެންދާނެ ކަމަށް އުންމީދުކުރެވޭ ކަމަށް ވިދާޅުވިއެވެ.
މީގެއިތުރުން ސްޓޭޓް މިނިސްޓަރު ވަނީ ހެލްތު ސެންޓަރަށް ބޭނުންވާ ބައެއް ތަކެތި މިހާރުވެސް ރަށައް ފޮނުވުމަށް ބޯޓަށް އަރުވާފައިވާ ކަމުގެ މަޢުލޫމާތު ހިއްސާކުރައްވާފައެވެ.
ފިޔޯރީ ހެލްތު ސެންޓަރުގައި 24 ގަޑިއިރުގެ ޚިދުމަތް ދިނުމަށް ބޭނުންވާ ވަސީލަތްތައް ހަމަޖެހިގެން ދިއުމަކީ މި ރަށުގެ ރައްޔިތުންނަށް ލިބިގެންދާނެ ވަރަށް ބޮޑު ކުރިއެރުމެކެވެ.
# ގުޅުންހުރި ޚަބަރުތައް
ގުޅުންހުރި ޚަބަރެއް ނެތް