ފިޔޯރީގައި އޭޓީއެމް އެޅުމުގެ މަސައްކަތު އެއްބަސްވުމުގައި ސޮއިކޮށްފި

ގދ. ފިޔޯރީގައި ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމްއެއް ޤާއިމްކުރުމަށްޓަކައި މަސައްކަތު އެއްބަސްވުމުގައި މިއަދު ވަނީ ސޮއިކޮށްފައެވެ. މި އެއްބަސްވުމުގައި ސޮއިކުރީ ފިޔޯރީ ކައުންސިލާއި އިހެލި ކޮންޓްރެކްޝަން އެންޑް ޓްރޭޑިންގ ޕްރައިވެޓް ލިމިޓެޑާ ދެމެދުގައެވެ.

އެއްބަސްވުމުގައިވާ ގޮތުން، އިހެލި ކޮންޓްރެކްޝަން އެންޑް ޓްރޭޑިންގއާ ހަވާލުކުރެވޭ މި މަސައްކަތް 18 ދުވަހުގެ ތެރޭގައި ނިންމަންޖެހޭނެއެވެ. މި މަޝްރޫޢުގެ މަސައްކަތް ބީއެމްއެލްއިން ކުރިއަށް ގެންދަނީ ކައުންސިލާ ހަވާލުކޮށްގެން، ކައުންސިލް މެދުވެރިކޮށެވެ.

މި މަޝްރޫޢަކީ ރާއްޖޭގެ ހުރިހާ ރަށެއްގައި އޭޓީއެމް ބެހެއްޓުމަށް ސަރުކާރުން ވެފައިވާ ވަޢުދު ފުއްދުމުގެ ގޮތުން ކުރިއަށްގެންދާ މަސައްކަތުގެ ތެރެއިން ބައެކެވެ. މި މަޝްރޫޢު ފުރިހަމަވުމުން ފިޔޯރީގެ ރައްޔިތުންނަށް ބޭންކިންގ ޚިދުމަތްތައް ފަސޭހަކަމާއެކު ލިބިގެންދާނެއެވެ.

ރަށްރަށުގައި އޭޓީއެމް ޤާއިމްކުރުމަކީ ރައްޔިތުންނަށް ފައިސާ ނެގުމާއި ޖަމާކުރުމުގެ ޚިދުމަތް ފަސޭހަކަމާއެކު ލިބިގެންދާނެ ކަމެކެވެ. އަދި މިއީ ރަށު ފެންވަރުގައި މާލީ ޚިދުމަތްތައް ފުޅާކުރުމަށް އެޅޭ މުހިންމު ފިޔަވަޅެއް ކަމުގައިވެސް ބެލެވެއެވެ.