ފިޔޯރީ ހެލްތު ސެންޓަރަށް ކައުންސިލުން ޒަމާނީ އިކުއިޕްމަންޓް ހަދިޔާކޮށްފި

ފިޔޯރީ ހެލްތު ސެންޓަރުގެ ޚިދުމަތްތައް އިތުރަށް ހަރުދަނާކޮށް ޒަމާނީކުރުމުގެ މަޤްޞަދުގައި، އެ ސެންޓަރުގެ ޕަބްލިކް ހެލްތު ޔުނިޓާއި ލޭބަރ ރޫމަށް ބޭނުންވާ ދެ ޑިޖިޓަލް ބޭބީ ސްކޭލް ފިޔޯރީ ކައުންސިލުން ވަނީ ހަދިޔާކޮށްފައެވެ.
ހަދިޔާކުރެވުނު އިކުއިޕްމަންޓްތަކަކީ ސެކާ 374 (SECA 374) މޮޑެލްގެ ވަޔަރލެސް ޑިޖިޓަލް ބޭބީ ސްކޭލްތަކެއް ކަމަށްވާއިރު، މި ތަކެތި ހޯދުމަށް ކައުންސިލުގެ ބަޖެޓުން 21,840 ރުފިޔާ ޚަރަދުކޮށްފައިވެއެވެ. މިއީ ފިޔޯރީ ކައުންސިލުން 2025 ވަނަ އަހަރުގެ ބަޖެޓުން ޞިއްޙީ ދާއިރާއަށް އެހީތެރިކަން ފޯރުކޮށްދިނުމަށް ނިންމާފައިވާ ނިންމުމާ އެއްގޮތަށް ކުރިއަށް ގެންދިޔަ ހަރަކާތެކެވެ.

ސިއްޙީ މަރުކަޒު ހިންގެވުމާ ހަވާލުވެ ހުންނެވި އަލްފާޟިލް މުޙައްމަދު ސައީދު ފާހަގަކުރެއްވި ގޮތުގައި، ކުރިން ސިއްޙީ މަރުކަޒުގައި ކުޑަކުދިން ކިރުމަށް ބޭނުންކުރާނެ ކައްޓާއެއް ނެތުމާއެކު، މިއީ ވަރަށް މުހިންމު އެހީތެރިކަމެއް ގޮތުގައި ފާހަގަކުރެއްވިއެވެ. އަދި މިހާރު މި ދެ ކައްޓާ ދެ ޔުނިޓުގައި ބޭނުންކުރަމުންދާކަމާއި، މީގެ ސަބަބުން ޚިދުމަތް ދިނުމުގައި ވަރަށް ބޮޑު ފަސޭހައެއް ލިބިފައިވާ ކަމަށް ވިދާޅުވިއެވެ.
މި އިކުއިޕްމަންޓްތައް ހަދިޔާކުރުމުގެ މައިގަނޑު މަޤްޞަދަކީ ހެލްތު ސެންޓަރުން ތުއްތު ކުދިންނަށް ފޯރުކޮށްދެމުންދާ ޚިދުމަތްތައް އިތުރަށް ފުރިހަމަކޮށް، ޒަމާނީ ފެންވަރަށް ރަނގަޅުކުރުމެވެ. ކައުންސިލްގެ އުންމީދަކީ މި އިކުއިޕްމަންޓްތަކުގެ ސަބަބުން ހެލްތު ސެންޓަރުން ތުއްތު ކުދިންނަށް ދެމުންދާ ޚިދުމަތްތަކަށް އިތުރު ފުރިހަމަކަމެއް ލިބިގެން ދިއުމެވެ.
ސިއްޙީ މަރުކަޒުގެ ފަރާތުން ފިޔޯރީ ކައުންސިލްގެ ރައީސް ފައިޒަރު ރަޝީދުއަށާއި ކައުންސިލް މެމްބަރުންނަށް ޚާއްޞަ ޝުކުރެއް އަދާކޮށްފައިވެއެވެ.