ފިޔޯރީ ކައުންސިލް - ފޭސް ޤުރުއާން މުބާރާތް 1446 ނިންމުމުގެ ރަސްމިއްޔާތު ބާއްވައިފި

ފިޔޯރީ ކައުންސިލުން އަހަރީ ގޮތުން ބާއްވަމުން އަންނަ ޤުރުއާން މުބާރާތުގެ ނިންމުމުގެ ރަސްމިއްޔާތު މިއަދު ފިޔޯރީ ޔޫތް ސެންޓަރުގެ ހޯލުގައި ވަރަށް ކާމިޔާބު ކަމާއެކު ބާއްވައި ނިންމާލައިފިއެވެ. "ފިޔޯރީ ކައުންސިލް - ފޭސް ޤުރުއާން މުބާރާތް 1446" ގެ ނަމުގައި ބޭއްވުނު މި މުބާރާތަކީ މި މަހުގެ 25 އިން 26 އަށް ދެ ދުވަހުގެ މުއްދަތަށް ކުރިޔަށް ގެންދެވުނު މުބާރާތެކެވެ.

ކޮންމެ އަހަރެއްގެ ރަމަޟާން މަހާ ދިމާކޮށް ބާއްވަމުން އަންނަ މި މުބާރާތް މިއަހަރު ވަނީ ފިޔޯރީ އެސޯސިއޭޝަން ފޮރ ކޮމިއުނިޓީ އެމްޕަވަރމެންޓް (ފޭސް) އާ ހަވާލުކޮށްގެން ވަރަށް ފުރިހަމަ ގޮތެއްގައި ކުރިޔަށް ގެންގޮސްފައެވެ. މުބާރާތުގެ ނިންމުމުގެ ރަސްމިއްޔާތުގައި އެކި އުމުރުފުރައިގެ ކެޓަގަރީތަކުން ވަނަތައް ހޯދި ހުރިހާ ބައިވެރިންނަށް ސެޓްފިކެޓާއި ޓްރޮފީ އަދި ފައިސާގެ އިނާމު ހަވާލުކުރެވުނެވެ.

ފިޔޯރީ ކައުންސިލުން މިފަދަ މުބާރާތްތައް ބޭއްވުމުގެ މައިގަނޑު މަޤްޞަދަކީ ރަށުގެ ކުޑަކުދިންނާއި ޒުވާނުންގެ މެދުގައި ކީރިތި ޤުރުއާނަށް ލޯބި ޖެއްސުމާއި، ޤުރުއާން ކިޔެވުމުގެ ފަންނު ކުރިއެރުވުމެވެ. މީގެ އިތުރުން ޤުރުއާން ކިޔެވުމުގެ ރޮނގުން ހުނަރުވެރި ޖީލެއް ބިނާކުރުމަށް މަގުފަހިކޮށްދިނުމާއި، ރަށުގެ ޒުވާނުންނާއި ކުޑަކުދިންގެ މެދުގައި ހެޔޮ ވާދަވެރިކަމެއް އުފެއްދުމަކީވެސް މި މުބާރާތުގެ މުހިންމު މަޤްޞަދުތަކުގެ ތެރޭގައި ހިމެނޭ ކަންކަމެވެ.

މި އަހަރުގެ މުބާރާތް އިންތިޒާމްކޮށް ކުރިޔަށް ގެންދިއުމަށްޓަކައި ފިޔޯރީ ކައުންސިލުން ވަނީ 50,000 ރުފިޔާގެ ފައިސާގެ އެހީތެރިކަމެއް ފޯރުކޮށްދީފައެވެ. މި އެހީތެރިކަމުގެ ސަބަބުން މުބާރާތުގެ އިންތިޒާމްތައް ވަރަށް ފުރިހަމަ ގޮތެއްގައި ހަމަޖެއްސުމަށް މަގުފަހިވެގެން ގޮސްފައިވާކަން ފާހަގަކުރެވެއެވެ.

މި މުބާރާތަކީ ރަށުގެ ޤުރުއާން ކިޔެވުމުގެ ފެންވަރު މަތިކޮށް، ދަރިވަރުންގެ މެދުގައި ވާދަވެރި ރޫހެއް އުފެއްދުމަށް މުހިންމު ދައުރެއް އަދާކުރާ މުބާރާތެއްގެ ގޮތުގައި ފާހަގަކުރެވެއެވެ. އަދި ކޮންމެ އަހަރަކުވެސް މި މުބާރާތް އިތުރަށް ކުރިއަރުވައި، ފުޅާކުރުމަށް ކައުންސިލުން މަސައްކަތްކުރަމުންދާކަން ފާހަގަކުރެވެއެވެ.

ނިންމުމުގެ ރަސްމިއްޔާތުގައި ވާހަކަދެއްކެވި ބޭފުޅުން ފާހަގަކުރެއްވި ގޮތުގައި މިފަދަ މުބާރާތްތަކަކީ ރަށުގެ ދަރިވަރުންގެ މެދުގައި ދީނީ ހޭލުންތެރިކަން އިތުރުކޮށް، އިސްލާމީ ތަރުބިއްޔަތު އާލާކުރުމަށް މުހިންމު ދައުރެއް އަދާކުރާ ހަރަކާތްތަކެކެވެ. އަދި ކުރިއަށް އޮތް އަހަރުތަކުގައިވެސް މި މުބާރާތް އިތުރަށް ފުޅާކޮށް ކުރިއަށް ގެންދިއުމަށް ވަނީ ރޭވިފައެވެ.